పయనించే సూర్యుడు న్యూస్ : కరీంనగర్ మున్సిపల్ కార్పొరేషన్ మేయర్ పీఠం ఎవరికి దక్కుతుందనే దానిపై సస్పెన్స్ వీడింది. కరీంనగర్ మేయర్ పీఠం బీజేపీ ఖాతాలోకి వెళ్లింది. అలాగే డిప్యూటీ మేయర్ పదవిని కూడా కమలం పార్టీ కైవసం చేసుకుంది. దీంతో కేంద్ర మంత్రి, స్థానిక ఎంపీ బండి సంజయ్ తన మార్క్ను చాటుకున్నారు. వివరాలు కరీంనగర్ మున్సిపల్ కార్పొరేషన్ విషయానికి వస్తే మొత్తం 66 స్థానాలు ఉండగా, బీజేపీ 30 స్థానాలు, కాంగ్రెస్ 14 స్థానాలు, ఎంఐఎం 3 స్థానాల్లో, బీజేపీ 9 స్థానాల్లో, ఆలిండియా ఫార్వర్డ్ బ్లాక్ రెండు స్థానాల్లో, స్వతంత్రులు 8 స్థానాల్లో విజయం సాధించారు. అయితే ముగ్గురు ఎక్స్ అఫీషియో సభ్యులు ఇక్కడ నమోదు చేసుకున్నారు. అయితే కరీంనగర్ మున్సిపల్ కార్పొరేషన్ మేయర్ పీఠం దక్కించుకునేందుకు బండి సంజయ్ తనవంతు ప్రయత్నాలు చేశారు. కొందరు స్వతంత్రులను బీజేపీ వైపునకు తిప్పుకున్నారు. మరోవైపు స్వతంత్రులుగా గెలిచిన పలువురు కార్పొరేటర్లు కాంగ్రెస్ గూటికి చేరారు. అయితే ఈరోజు ఉదయం కరీంనగర్ మున్సిపల్ కార్పొరేషన్ మేయర్, డిప్యూటీ మేయర్ ఎన్నికను చేపట్టారు. తొలుత ఇటీవల కార్పొరేటర్లుగా గెలిచినవారు ప్రమాణ స్వీకారం చేశారు. అనంతరం మేయర్ ఎన్నిక చేపట్టారు. ఇందులో బీజేపీ బలపరిచిన అభ్యర్థి కొలగాని శ్రీనివాస్ విజయం సాధించారు. కొలగాని శ్రీనివాస్కు మద్దతుగా 34 మంది నిలాచారు. మరోవైపు కాంగ్రెస్ మేయర్ అభ్యర్థికి 21 ఓట్లు వచ్చాయి. దీంతో కరీంనగర్ మున్సిపల్ కార్పొరేషన్పై బీజేపీ జెండా నిలుపుతామని ప్రకటించిన బండి సంజయ్ ఆశయం నెరవేరింది. దీంతో కరీంనగ్ మున్సిపల్ కార్పొరేషన్ తొలిసారిగా బీజేపీ చేతుల్లోకి వెళ్లింది. దీంతో బీజేపీ శ్రేణులు సంబరాలు చేసుకుంటున్నారు. ఈ ఫలితం వెనక బండి సంజయ్ కృషి ఉందని పార్టీ శ్రేణులు పేర్కొంటున్నాయి. అయితే మొత్తంగా కరీంనగర్లో ‘‘కమలం’’ పార్టీ అద్భుత ప్రదర్శనలో బండి సంజయ్ కీలక పాత్ర పోషించారు. అభ్యర్థుల ఎంపిక దగ్గర నుంచి ప్రచారం వరకు పక్కా ప్రణాళికతో ముందుకు వెళ్లారు. సర్వేలపై ఆధారపడటంతో పాటు పార్టీ కోసం కష్టపడిన కార్యకర్తలకు, నాయకులకు టికెట్లు ఇచ్చారు. అభ్యర్థుల గెలుపు బాధ్యతలను భుజానికి ఎత్తుకుని బండి సంజయ్ ప్రచారం నిర్వహించారు. ఇప్పుడు ఎన్నికల ఫలితాల తర్వాత కూడా కరీంనగర్ మేయర్ పీఠంపై బీజేపీ కార్పొరేటర్ను కూర్చొబెట్టడంలో సక్సెస్ అయ్యారు. మొత్తంగా కరీంనగర్లో ‘‘బండి’’ మార్క్ రాజకీయం కనిపిస్తుంది.
