పయనించే సూర్యుడు న్యూస్ : తెలంగాణ మున్సిపల్ ఎన్నికలపై కేటీఆర్ బీఆర్ఎస్ కార్యకర్తలను అభినందించారు. కాంగ్రెస్ అరాచకాలు, రేవంత్ రెడ్డి దుర్వినియోగంపై తీవ్ర విమర్శలు చేశారు. ప్రజాస్వామ్యానికి న్యాయం కోరారు.తెలంగాణలో మున్సిపల్ ఎన్నికల పోలింగ్ ముగిసిన నేపథ్యంలో, బీఆర్ఎస్ కార్యనిర్వాహక అధ్యక్షుడు కేటీఆర్ పార్టీ శ్రేణులను ఉద్దేశించి కీలక వ్యాఖ్యలు చేశారు. ఎన్నికల రణక్షేత్రంలో అధికార పార్టీ ఎన్ని అడ్డంకులు సృష్టించినా, రకరకాల ప్రలోభాలు చూపినా వెనకడుగు వేయకుండా వీరోచితంగా పోరాడిన ప్రతి కార్యకర్తను ఆయన మనస్ఫూర్తిగా అభినందించారు. క్షేత్రస్థాయిలో గులాబీ సైనికులు చూపిన మొక్కవోని దీక్షకు ఆయన పేరుపేరునా ధన్యవాదాలు తెలిపారు. కాంగ్రెస్ అరాచకాలపై ఆగ్రహం ఎన్నికల ప్రక్రియ సాగుతున్నంత సేపు అధికార కాంగ్రెస్ పార్టీ నాయకులు అరాచకాలకు, దౌర్జన్యాలకు పాల్పడ్డారని కేటీఆర్ తీవ్రంగా మండిపడ్డారు. ప్రజాస్వామ్య పద్ధతిలో ఎన్నికలు నిర్వహించాల్సింది పోయి, కండబలం ఉపయోగించి గెలవాలని చూడటం దురదృష్టకరమని విమర్శించారు. అధికార అండతో విపక్షాలను అణచివేయాలని చూడటం వారి నియంతృత్వ ధోరణికి నిదర్శనమని ఆయన ధ్వజమెత్తారు. పోరాట స్ఫూర్తికి నీరాజనం ఉత్తరాన ఆదిలాబాద్ నుండి దక్షిణాన ఆలంపూర్ వరకు రాష్ట్రవ్యాప్తంగా జరిగిన పురపాలక సమరంలో బీఆర్ఎస్ కార్యకర్తలు ప్రదర్శించిన స్ఫూర్తి అమోఘమని కేటీఆర్ కొనియాడారు. ఈ పోరాట పటిమ పార్టీకి కొండంత బలాన్ని, ఆత్మవిశ్వాసాన్ని నింపిందని పేర్కొన్నారు. గత రెండేళ్ల పాలనలో ప్రజలకు ఇచ్చిన హామీలను నెరవేర్చడంలో విఫలమైన ముఖ్యమంత్రి రేవంత్ రెడ్డి, ఓడిపోతామనే భయంతోనే హింసను ఆశ్రయించారని ఆరోపించారు. ఓటమి భయంతోనే అధికార దుర్వినియోగం గతంలో జరిగిన పంచాయతీ ఎన్నికల్లో ఎదురైన పరాభవం పట్టణ ప్రాంతాల్లో కూడా పునరావృతమవుతుందనే ఆందోళన ముఖ్యమంత్రిలో స్పష్టంగా కనిపిస్తోందని కేటీఆర్ ఎద్దేవా చేశారు. ఈ భయం కారణంగానే అడుగడుగునా అధికార యంత్రాంగాన్ని దుర్వినియోగం చేస్తూ, అక్రమ మార్గాల్లో గెలవాలని ప్రయత్నిస్తున్నారని విమర్శించారు. ప్రజాస్వామ్యాన్ని అపహాస్యం చేస్తూ సాగుతున్న ఈ దౌర్జన్యకాండను ప్రజలు గమనిస్తున్నారని హెచ్చరించారు. వేధింపులకు తగిన మూల్యం తప్పదు పోలీసు వ్యవస్థను అడ్డం పెట్టుకుని బీఆర్ఎస్ శ్రేణులపై వేధింపులకు దిగడం, దాడులు చేయించడం వంటి చర్యలకు రేవంత్ రెడ్డి త్వరలోనే భారీ మూల్యం చెల్లించుకోవాల్సి ఉంటుందని కేటీఆర్ స్పష్టం చేశారు. పరిపాలనను పూర్తిగా గాలికి వదిలేసి రాష్ట్రాన్ని సంక్షోభంలోకి నెట్టిన పాపం ఈ ప్రభుత్వాన్ని వెంటాడుతుందని విమర్శించారు. ఎన్ని నిర్బంధాలు ఎదురైనా, ఎన్ని అక్రమ కేసులు పెట్టినా ప్రజల పక్షాన నిలబడి బీఆర్ఎస్ నిరంతరం పోరాటం సాగిస్తుందని ఆయన ఉద్ఘాటించారు.
