సాక్షి డిజిటల్ న్యూస్ :ఆంధ్రప్రదేశ్లోని విద్యార్థులకు రాష్ట్ర ప్రభుత్వం గుడ్ న్యూస్ చెప్పింది. ఆ వివరాలు ఇలా ఉన్నాయి… ఆంధ్రప్రదేశ్లోని విద్యార్థులకు రాష్ట్ర ప్రభుత్వం గుడ్ న్యూస్ చెప్పింది. రాష్ట్రంలో పెండింగ్ ఫీజు రీయింబర్స్మెంట్ బకాయిలను వెంటనే విడుదల చేయాలని విద్యార్థి సంఘాలు, ప్రైవేట్ కాలేజ్లు డిమాండ్ చేస్తున్న సంగతి తెలిసిందే. ఫీజు రీయింబర్స్మెంట్ నిధుల విడుదలలో జాప్యంతో విద్యార్థులు ఇబ్బందులు పడుతున్నారు. అయితే ఈ క్రమంలోనే విద్యార్థులకు విద్యాశాఖ మంత్రి నారా లోకేష్ తీపి కబురు చెప్పారు. పెండింగ్లో ఉన్న ఫీజు రీయింబర్స్మెంట్ బకాయిల కోసం దాదాపు రూ.1,198 కోట్లు విడుదల చేసింది. ఈ మేరకు ఆర్థిక శాఖ ఉత్తర్వులు జారీ చేసింది. ఇక, రాష్ట్ర ప్రభుత్వం పెండింగ్ ఫీజు రీయింబర్స్మెంట్ బకాయిలను వెంటనే విడుదల చేయాలని విద్యార్థి సంఘాలు డిమాండ్ చేస్తున్నాయి. ప్రస్తుతం ఫీజు రీయింబర్స్మెంట్ బకాయిలు రూ.7 వేల కోట్లున్నాయని.. ఈ బకాయిలు విడుదల చేయకపోవడం వల్ల విద్యార్థులు తీవ్ర ఇబ్బందులు పడుతున్నారని తెలిపాయి. విద్యా సంస్థలు విద్యార్థులను మిడ్, సెమిస్టర్ పరీక్షలకు హాజరు కానివ్వడం లేదని ఆరోపిస్తున్నాయి. ఫీజు చెల్లించిన వారికే హల్ టికెట్లు మంజూరు చేస్తామంటూ విద్యార్థులను విద్యాసంస్థలు భయాందోళనకు గురిచేస్తున్నాయని పేర్కొంటున్నారు. అందుకే ప్రభుత్వం వెంటనే ఈ బకాయిలను విడుదల చేయాలని డిమాండ్ చేస్తున్నాయి. అయితే కిందటి అసెంబ్లీ సమావేశాల సందర్భంగా మంత్రి లోకేష్ శాసనమండలి వేదికగా ఫీజు రీయింబర్స్మెంట్ అంశం గురించి మాట్లాడారు. గత వైసీపీ ప్రభుత్వం రూ. 4 వేల కోట్ల ఫీజు రీయింబర్స్మెంట్ బకాయిలు పెండింగ్ పెట్టిందని ఆరోపించారు. ఇక, గత పాలన నుంచి ఉన్న బకాయిలను దశలవారీగా చెల్లించడానికి కట్టుబడి ఉన్నామని ప్రభుత్వం ఇదివరకే తెలిపిన సంగతి తెలిసిందే. పెండింగ్ రీయింబర్స్మెంట్లను పరిష్కరించడానికి ప్రభుత్వం కట్టుబడి ఉందని… అందువల్ల ఫీజు చెల్లింపుల కోసం విద్యార్థులను ఒత్తిడి చేయవద్దని విద్యా సంస్థలకు సూచించింది. విద్యార్థులను తరగతులుకు హాజరుకానివ్వకుండా చేయడం, హాల్ టిక్కెట్లను నిలిపివేయడం, పరీక్ష హాలులోకి అనుమతించకపోవడం… వంటి ఏదైనా బలవంతపు చర్యలకు పాల్పడటం చట్టవిరుద్ధం, ఆమోదయోగ్యం కానిదిగా పరిగణిస్తామని తెలిపింది. ఇటువంటి ఘటనలకు పాల్పడితే తీవ్రమైన శిక్షార్హమైన చర్యలు తీసుకుంటామని తెలిపింది.
