జనం న్యూస్ : మేడారం జాతర -2026కు భక్తులకు తరలించడం, తిరిగి వారిని స్వస్థలాలకు చేర్చడం కోసం స్పెషల్ బస్సులను నడపాలని తెలంగాణ ఆర్టీసీ నిర్ణయించింది. ఆసియా ఖండంలోనే అతిపెద్ద గిరిజన జాతరగా పేరొందిన మేడారం సమ్మక్క-సారలమ్మ జాతర ఈ నెల 28 నుంచి 31 వరకు జరగనున్న సంగతి తెలిసిందే. ప్రతి రెండేళ్లకు ఒకసారి నిర్వహించే మేడారం మహా జాతరకు రాష్ట్ర ప్రభుత్వం విస్తృత ఏర్పాటు చేపట్టింది. మేడారంలో ప్రభుత్వం చేపట్టిన పలు అభివృద్ది పనులు కూడా చివర దశకు చేరుకున్నారు. అయితే మేడారం జాతరకు తెలంగాణ నుంచే కాకుండా పక్క రాష్ట్రాల నుంచి కూడా పెద్ద సంఖ్యలో భక్తులు తరలివస్తారనే సంగతి తెలిసిందే. ఈ క్రమంలోనే మేడారం మహా జాతర -2026కు భక్తులకు తరలించడం, తిరిగి వారిని స్వస్థలాలకు చేర్చడం కోసం స్పెషల్ బస్సులను నడపాలని తెలంగాణ ఆర్టీసీ నిర్ణయించింది. ఈ ఏడాది జరగనున్న మేడారం మహా జాతరకు 3,495 ప్రత్యేక బస్సులను నడపనున్నట్టుగా టీజీఎస్ఆర్టీసీ తెలిపింది. అవసరమైతే మరిన్ని బస్సులు నడిపేందుకు సిద్దంగా ఉన్నట్టుగా పేర్కొంది. అయితే ఈ బస్సుల్లో 50శాతం అదనపు ఛార్జీలు వసూలు చేయనున్నట్టు వెల్లడించింది. 2003లో జారీ చేసిన జీవో నెం. 16 ప్రకారం అదనపు ఇంధనం, నిర్వహణ ఖర్చులను భరించడానికి పండుగలు, ప్రత్యేక సందర్భాలలో నడిపే ప్రత్యేక బస్సులకు టిక్కెట్ ఛార్జీలను 1.5 రెట్లు వరకు సవరించడానికి సంస్థకు అనుమతి ఉందని కూడా టీజీఎస్ఆర్టీసీ పేర్కొంది. అయితే ఈ స్పెషల్ బస్సుల్లో (ఆర్డినరీ, ఎక్స్ప్రెస్) కూడా మహాలక్ష్మి పథకం కింద మహిళలకు ఉచిత ప్రయాణ సౌకర్యం ఉంటుందని టీజీఎస్ఆర్టీసీ స్పష్టం చేసింది. ఇక, ఉమ్మడి కరీంనగర్, వరంగల్, ఆదిలాబాద్ జిల్లాలలోని బస్టాండ్లతో పాటు రాష్ట్రంలోని వివిధ ప్రాంతాల నుంచి మేడారంకు టీజీఎస్ఆర్టీసీ ప్రత్యేక బస్సులు నడపనుంది. ఇక, మేడారంలో కూడా ఆర్టీసీ బస్సుల పార్కింగ్ కోసం భారీగా ఏర్పాట్లు చేయనున్నారు. అలాగే తాత్కాలిక బస్ స్టేషన్ను ఏర్పాటు చేసి.. భక్తులకు ఎలాంటి ఇబ్బందులు లేకుండా కౌంటర్లు, క్యూ లైన్లు ఏర్పాటు చేయనున్నారు. అక్కడ ఏర్పాటు చేసే సూచిక బోర్డుల ఆధారంగా భక్తులు.. తాము వెళ్లే ప్రాంతానికి సంబంధించిన క్యూ లైన్లలోకి వెళితే.. అక్కడ బస్సులు అందుబాటులో ఉండనున్నాయి. ఇందుకోసం పెద్ద ఎత్తున ఆర్టీసీ సిబ్బందిని అక్కడ మోహరించనున్నారు. అలాగే కంట్రోల్ రూమ్ కూడా ఏర్పాటు చేయనున్నారు. వారికోసం తాత్కాలిక విశ్రాంతి కేంద్రాలు కూడా ఏర్పాటు చేస్తున్నారు. వారికి తాగునీరు, భోజన వసతి కోసం కూడా ప్రత్యేకంగా ఏర్పాట్లు చేస్తున్నారు. మేడారం జాతర నేపథ్యంలో ఆర్టీసీ సిబ్బందికి, ప్రత్యేకంగా డ్రైవర్లకు సూచనలు చేయనున్నారు.
