బాలుడి మృతి కేసులో మౌనం ఎందుకు? ప్రభావశీలుల నీడలో దర్యాప్తు నిలిచిపోయిందా – న్యాయం కోసం తల్లిదండ్రుల ఆర్తనాదం

సాక్షి డిజిటల్ న్యూస్ : ఫిబ్రవరి 25, (ప్రకాశం & మార్కాపురం జిల్లా బ్యూరో ఇంచార్జ్ : షేక్ మక్బూల్ బాష).
ప్రకాశం జిల్లా సింగరాయకొండలోని శ్రీ చైతన్య నవోదయ & సైనిక్ స్కూల్ హాస్టల్‌లో కనిగిరి పట్టణానికి చెందిన ఆరవ తరగతి చదువుతున్న "తౌషిక్" అనుమానాస్పద మృతి కేసు ఇప్పుడు కేవలం ఒక కుటుంబం విషాదం మాత్రమే కాదు, వ్యవస్థల నిష్పాక్షికతపై కూడా గంభీర ప్రశ్నగా మారింది. ఒకవైపు కుమారుడిని కోల్పోయిన కడుపుకోత, మరోవైపు న్యాయం కోసం తలుపులు తడుతున్నా స్పందన లేకపోవడం వారిని మానసికంగా, సామాజికంగా కృంగదీస్తోంది. ఈ కేసులో కొత్తగా వినిపిస్తున్న ఆరోపణ ఏమిటంటే, సంబంధిత విద్యాసంస్థ యజమాని ప్రస్తుత అధికార పార్టీలోని ఒక సీనియర్ నాయకుడికి బంధువనే కారణంగానే రాజకీయ నాయకులు, అధికారులు, పోలీసు వ్యవస్థ స్పందించకుండా మౌనంగా ఉన్నారనే అనుమానం ప్రజల్లో బలపడుతోంది. ఇది నిజమా కాదా అనేది దర్యాప్తు ద్వారా తేలాల్సిందే. అయితే ఈ అనుమానం తలెత్తడానికి కారణం, పది రోజులు గడిచినా స్పష్టమైన చర్యలు కనిపించకపోవడమే. తల్లిదండ్రుల వాదన ప్రకారం, వారు న్యాయం కోరుతూ ప్రశ్నిస్తే తమపైనే కేసులు పెడతామని బెదిరింపులు వస్తున్నాయని చెబుతున్నారు. ఒక అనుమానాస్పద మృతి కేసులో ఫిర్యాదు చేసిన తల్లిదండ్రులపై బెదిరింపులు వచ్చాయంటే అది మరింత ఆందోళనకరమైన అంశం. భారత రాజ్యాంగం ప్రతి పౌరుడికి న్యాయం కోరే హక్కును హామీ ఇస్తుంది. ఫిర్యాదు చేయడం, దర్యాప్తు కోరడం నేరం కాదు. పైగా బాలుడి మరణం వంటి సున్నితమైన అంశంలో పోలీసుల బాధ్యత మరింత ఎక్కువగా ఉంటుంది. ఇక్కడ ప్రధాన ప్రశ్నలు స్పష్టంగా నిలుస్తున్నాయి. పోస్ట్‌మార్టం పూర్తి నివేదిక ఎందుకు ఆలస్యం అవుతోంది? ప్రాథమిక ఫిర్యాదు ఆధారంగా కేసు నమోదు ఎందుకు జరగలేదు? సంఘటన స్థలంలోని సీసీటీవీ ఫుటేజీ, కాల్ రికార్డులు, హాస్టల్ సిబ్బంది స్టేట్మెంట్లు సేకరించబడ్డాయ? ప్రధాన ఆరోపణలు ఎదుర్కొంటున్న వారిని విచారణలో భాగంగా కస్టడీలోకి తీసుకున్నారా? ఈ ప్రశ్నలకు పారదర్శక సమాధానాలు ఇవ్వడం ద్వారా మాత్రమే అనుమానాలు తొలగుతాయి. విద్యాసంస్థలు పిల్లల భద్రతకు బాధ్యత వహించాల్సిన ప్రదేశాలు. అక్కడ జరిగే అనుమానాస్పద మరణాలు వ్యవస్థకు ఇచ్చే హెచ్చరిక. రాజకీయ అనుబంధాలు, ప్రభావాలు దర్యాప్తును ప్రభావితం చేస్తే అది ప్రజాస్వామ్యానికి ప్రమాదకరం. చట్టం ముందు అందరూ సమానమే అన్న సూత్రం అమల్లో ఉందని చూపించాల్సిన సమయం ఇది. అధికార పార్టీకి చెందిన వ్యక్తి బంధుత్వం ఉన్నా లేకపోయినా, నిజం బయటపడాలి. నిర్దోషి అయితే స్పష్టంగా ప్రకటించాలి. తప్పు ఉంటే కఠిన చర్యలు తీసుకోవాలి.పోలీసు శాఖపై ప్రస్తుతం ఉన్న బాధ్యత ద్విగుణీకృతం. ఒకవైపు బాధిత కుటుంబానికి న్యాయం చేయాలి, మరోవైపు ప్రజల్లో నమ్మకాన్ని నిలబెట్టాలి. దర్యాప్తు పురోగతిపై అధికారిక బులెటిన్లు విడుదల చేయడం, పోస్ట్‌మార్టం నివేదికను కుటుంబానికి అందించడం, అవసరమైతే ఉన్నతాధికారుల పర్యవేక్షణలో ప్రత్యేక దర్యాప్తు బృందం ఏర్పాటు చేయడం వంటి చర్యలు తీసుకుంటేనే పారదర్శకతకు అర్థం ఉంటుంది.కడుపుకోత మిగిల్చుకుని న్యాయం కోసం పోరాడుతున్న తల్లిదండ్రుల కేక వ్యవస్థ చెవులు మూసుకోవడానికి కాదు. ఇది రాజకీయాల విషయం కాదు. ఇది ఒక చిన్నారి జీవితం విషయం. ఈ కేసు నిజానిజాలు వెలికితీసి బాధ్యులు ఎవరైనా చట్టపరమైన చర్యలు తీసుకోవడం ద్వారా మాత్రమే సమాజం న్యాయవ్యవస్థపై విశ్వాసం నిలుపుకోగలదు. ఇప్పుడైనా బాధ్యతగల అధికారులు మౌనం వీడి, చట్టపరమైన విధులను పారదర్శకంగా నిర్వర్తించాల్సిన సమయం ఆసన్నమైంది.