తెలంగాణలో బీజేపీకి షాక్-మాజీ ఎమ్మెల్యే రమేష్ రాజీనామా

పయనించే సూర్యుడు న్యూస్ : తెలంగాణలో మున్సిపల్ ఎన్నికల వేళ బీజేపీకి భారీ షాక్ తగిలింది. బీజేపీ నేత, వర్ధన్నపేట మాజీ ఎమ్మెల్యే అరూరి రమేష్ పార్టీకి రాజీనామా చేస్తున్నట్టుగా ప్రకటించారు. తెలంగాణలో మున్సిపల్ ఎన్నికల వేళ బీజేపీకి భారీ షాక్ తగిలింది. బీజేపీ నేత, వర్ధన్నపేట మాజీ ఎమ్మెల్యే అరూరి రమేష్ పార్టీకి రాజీనామా చేస్తున్నట్టుగా ప్రకటించారు. ఈ మేరకు అరూరి రమేష్ ఒక ప్రకటన విడుదల చేశారు. బీజేపీ ప్రాథమిక సభ్యత్వానికి రాజీనామా చేస్తున్నట్టుగా పేర్కొన్నారు. తనకు ఇన్ని రోజులు సహకరించిన బీజేపీ పెద్దలకు, నాయకులకు, కార్యకర్తలకు హృదయపూర్వక ధన్యవాదాలు చెబుతున్నట్టుగా ఆయన తెలిపారు. అయితే త్వరలోనే తాను బీఆర్ఎస్‌లో చేరబోతున్నట్టుగా ప్రకటించారు. బీఆర్ఎస్ అధిష్టానం ఆహ్వానం మేరకు తన ఇంటి పార్టీలో చేరాలని నిర్ణయించుకున్నట్టుగా తెలిపారు. పలువురు నాయకులు, అనుచరులు, అభిమానులతో కలిసి బీఆర్ఎస్ పార్టీలో పెద్ద ఎత్తున చేరనున్నట్టుగా అరూరి రమేష్ చెప్పారు. ఇక, ఆరూరి రమేష్… వర్ధన్నపేట అసెంబ్లీ నియోజకవర్గం నుంచి రెండు సార్లు (2014,2018 అసెంబ్లీ ఎన్నికల్లో) బీఆర్ఎస్ అభ్యర్థిగా పోటీ చేసి విజయం సాధించారు. అయితే 2023 అసెంబ్లీ ఎన్నికల్లో మాత్రం వర్ధన్నపేట నుంచి బీఆర్ఎస్ అభ్యర్థిగా బరిలో నిలిచి ఓటమిచెందారు. మరోవైపు రాష్ట్రంలో కూడా బీఆర్ఎస్ అధికారం కోల్పోవడంతో రాజకీయ పరిణామలు వేగంగా మారిపోయాయి. ఆరూరి రమేష్ బీజేపీలో చేరేందుకు ప్రయత్నాలు చేసుకున్నారు. ఈ క్రమంలోనే 2024 మార్చిలో ఆరూరి రమేష్ వ్యవహారం తీవ్ర చర్చనీయాంశంగా మారింది. అరూరి రమేష్‌ బీఆర్ఎస్‌‌ను వీడకుండా చూసేందుకు ఆ పార్టీ అధిష్టానం తీవ్ర ప్రయత్నాలు చేశారు. ఎర్రబెల్లి దయాకర్ రావు వంటి నేతలను ఆయన వద్దకు పంపి నచ్చజెప్పే ప్రయత్నాలు చేసింది. అయితే అరూరి రమేష్ 2024 మార్చి నెలలో బీఆర్ఎస్‌కు రాజీనామా చేసి బీజేపీ కండువా కప్పుకున్నారు. ఆ తర్వాత 2024 లోక్‌సభ ఎన్నికల్లో వరంగల్ పార్లమెంట్ స్థానం నుంచి బీజేపీ అభ్యర్థిగా బరిలో నిలిచారు. అయితే ఆయనకు చేదు అనుభవమే ఎదురైంది. కాంగ్రెస్ అభ్యర్థి కడియం కావ్య చేతిలో అరూరి రమేష్ ఓటమి చెందారు. అయితే కొంతకాలంగా బీజేపీ కార్యక్రమాలకు అరూరి రమేష్ దూరంగా ఉంటూ వస్తున్నారు. అయితే ఈ క్రమంలోనే అరూరి రమేష్‌ను తిరిగి బీఆర్ఎస్‌లోకి తీసుకొచ్చేందుకు ప్రయత్నాలు జరిగినట్టుగా తెలుస్తోంది. మాజీ మంత్రి ఎర్రబెల్లి దయాకర్ రావు, ఎమ్మెల్యే పల్లా రాజేశ్వర్ రెడ్డి‌లు అరూరి రమేష్‌తో చర్చలు జరిపి తిరిగి బీఆర్ఎస్‌లోని ఆహ్వానించినట్టుగా సమాచారం. బీఆర్ఎస్‌లో తగిన ప్రాధాన్యత ఉంటుందని కూడా బీఆర్ఎస్ అధిష్టానం ఆయనకు హామీ ఇచ్చినట్టుగా తెలుస్తోంది. ఈ క్రమంలోనే అరూరి రమేష్ బీజేపీని వీడి తిరిగి సొంతగూటికి చేరేందుకు సిద్దమయ్యారు.