పార్టీ వేదికపై మోదీ స్పష్టీకరణ:

జనం న్యూస్: బీజేపీ జాతీయ అధ్యక్షుడిగా నితిన్ నబీన్ మంగళవారం రోజున బాధ్యతలు స్వీకరించారు. ఈ సందర్భంగా నితిన్ నబీన్‌పై ప్రధాని మోదీ ప్రశంసలు కురిపించారు. బీజేపీ జాతీయ అధ్యక్షుడిగా నితిన్ నబీన్ మంగళవారం రోజున బాధ్యతలు స్వీకరించారు. బీజేపీ జాతీయ అధ్యక్ష పదవికి పార్టీలో జరిగిన సంస్థాగత ఎన్నికల్లో నితిన్ నబీన్ ఒక్కరే నామినేషన్‌ దాఖలు చేయడంతో ఆయన ఎన్నిక ఏకగ్రీవం అయింది. దీంతో ప్రస్తుతం బీజేపీ అధ్యక్షుడిగా ఉన్న జేపీ నడ్డా స్థానంలోకి ఆయన వచ్చారు. బీజేపీకి 12వ అధ్యక్షుడిగా నిలిచారు. ఢిల్లీలోని బీజేపీ కేంద్ర కార్యాలయంలో పార్టీ కొత్త అధ్యక్షుడిగా నితిన్ నబీన్ బాధ్యతలు స్వీకరించారు. ప్రధానమంత్రి నరేంద్ర మోదీ, కేంద్ర మంత్రులు అమిత్ షా, జేపీ నడ్డా, రాజ్‌నాథ్ సింగ్, నితిన్ గడ్కరీ సమక్షంలో ఈ కార్యక్రమం జరిగింది. ఈ సందర్భంగా ప్రధాని మోదీ మాట్లాడుతూ… నితిన్ నబీన్‌పై ప్రశంసల వర్షం కురిపించారు. నితిన్ నబిన్‌ను “మిలీనియల్”గా ప్రధాని మోదీ అభివర్ణించారు. ఆయన భారతదేశంలో ఎన్నో మార్పులను చూసిన తరానికి చెందినవారని పేర్కొన్నారు. పార్టీ విషయానికి వస్తే, నితిన్ నబీన్ తన బాస్ అని… పార్టీలో తాను కార్యకర్తను మాత్రమేనని చెప్పారు. ‘‘రాబోయే 25 సంవత్సరాలు చాలా ముఖ్యమైనవి. ఈ కాలంలోనే అభివృద్ధి చెందిన భారతదేశాన్ని నిర్మించాల్సి ఉంది… అది జరగడం ఖాయం. ఈ కీలకమైన కాలం ప్రారంభంలో మన నితిన్ నబిన్ జీ బీజేపీ వారసత్వాన్ని ముందుకు తీసుకువెళ్తారు. నేటి యువత భాషలో చెప్పాలంటే. నితిన్ జీ స్వయంగా ఒక విధంగా మిలీనియల్. ఆయన భారతదేశంలో ప్రధాన ఆర్థిక, సామాజిక, సాంకేతిక పరివర్తనలను చూసిన తరానికి చెందినవారు’’ అని మోదీ పేర్కొన్నారు. ‘‘ఆయన చిన్నతనంలో రేడియో నుంచి సమాచారాన్ని పొందిన తరానికి చెందినవారు… ఇప్పుడు ఆర్టిఫిషియల్ ఇంటెలిజెన్స్ (ఏఐ) యాక్టివ్ యూజర్‌గా ఉన్నారు. నితిన్ జీలో యువశక్తి, సంస్థాగత పనిలో విస్తృతమైన అనుభవం రెండూ ఉన్నాయి. ఇది మన పార్టీలోని ప్రతి కార్యకర్తకు చాలా ప్రయోజనకరంగా ఉంటుంది…’’అని ప్రధాని మోదీ అన్నారు. బీజేపీ అధ్యక్షుడి బాధ్యత కేవలం పార్టీకే పరిమితం కాదని.. ఎన్డీఏ కూటమిలో సమన్వయం సాధించడం కూడా ఆయన బాధ్యతేనని ప్రధాని మోదీ అన్నారు. ‘‘బీజేపీ ఒక సంస్కృతి. బీజేపీ ఒక కుటుంబం. ఇక్కడ మనుకు సభ్యత్వానికి మించిన సంబంధాలు ఉన్నాయి. బీజేపీ అనేది పదవి ద్వారా కాకుండా ప్రక్రియ ద్వారా నడిచే ఒక సంప్రదాయం. మా అధ్యక్షులు మారవచ్చు, కానీ మా ఆదర్శాలు మారవు. నాయకత్వం మారవచ్చు, కానీ దిశ మాత్రం అదే ఉంటుంది. బీజేపీ స్ఫూర్తి జాతీయమైనది. ఎందుకంటే మన అనుబంధం స్థానికమైనది. మన మూలాలు నేలలో లోతుగా పాతుకుపోయాయి. అందుకే బీజేపీ ప్రాంతీయ ఆకాంక్షలకు ఒక వేదికను అందిస్తుంది. వాటిని జాతీయ ఆశయాలకు పునాదిగా మారుస్తుంది. అందుకే ఈ రోజు దేశంలోని ప్రతి మూల నుంచి ప్రజలు బీజేపీతో ఉన్నారు. అలాగే బీజేపీలో చేరుతున్నారు. అంతేకాకుండా, తమ రాజకీయ ప్రయాణాన్ని ప్రారంభించాలనుకునే ఎవరికైనా బీజేపీ ఉత్తమమైన ఎంపికగా కనిపిస్తుంది’’ అని పార్టీ శ్రేణులను ఉద్దేశించి మోదీ పేర్కొన్నారు. సాధారణంగా. మిలీనియల్ అంటే 1981 నుంచి 1996 మధ్య జన్మించిన వ్యక్తి. నితిన్ నబీన్ 1980లో జన్మించినందున. ఆ జాబితాకు సరిహద్దుల్లో ఉన్నప్పటికీ ఆయనను మోదీ మిలీనియల్ అని పేర్కొన్నారు. ఇక, 1980లో జన్మించిన నితిన్‌ నబీన్‌. అదే ఏడాది ఏర్పాటై బీజేపీకి ప్రస్తుతం అధ్యక్ష బాధ్యతలు చేపట్టడం గమనార్హం.