భూముల ధరలపై సీఎం రేవంత్ రెడ్డి కీలక వ్యాఖ్యలు

పయనించే సూర్యుడు న్యూస్ : మహేశ్వరం మండలం రావిర్యాలలోని ఈ-సిటీలో ‘సుజెన్ మెడికేర్’ పరిశ్రమను ప్రారంభించిన ముఖ్యమంత్రి రేవంత్ రెడ్డి ‘భారత్ ఫ్యూచర్ సిటీ’ ఏర్పాటుతో ఈ ప్రాంతంలో భూముల ధరలు భారీగా పెరుగుతాయని వెల్లడించారు. రాష్ట్ర అభివృద్ధి కోసం పక్క రాష్ట్రాలతో జల వివాదాలను చర్చల ద్వారా పరిష్కరించుకోవాలని ఆయన ఆకాంక్షించారు. ముఖ్యంగా ఏపీ ముఖ్యమంత్రి చంద్రబాబు నాయుడుకు విజ్ఞప్తి చేస్తూ.. పాలమూరు-రంగారెడ్డి వంటి ప్రాజెక్టులకు సహకరించాలని కోరారు. సముద్ర తీరం లేని తెలంగాణకు మచిలీపట్నం పోర్టుతో అనుసంధానం కల్పించేలా 12 వరుసల గ్రీన్‌ఫీల్డ్ ఎక్స్‌ప్రెస్ వే నిర్మాణానికి మద్దతు అడిగారు. తెలంగాణ ప్రభుత్వం ప్రతిష్టాత్మకంగా చేపట్టిన ‘భారత్ ఫ్యూచర్ సిటీ’ ప్రాజెక్టు వల్ల ఆ ప్రాంతంలోని భూముల ధరలు భారీగా పెరగనున్నాయని ముఖ్యమంత్రి రేవంత్ రెడ్డి స్పష్టం చేశారు. రంగారెడ్డి జిల్లా మహేశ్వరం మండలం రావిర్యాలలోని ఈ-సిటీలో ‘సుజెన్ మెడికేర్’ ఐవీ ఫ్లూయిడ్స్ తయారీ కేంద్రాన్ని ప్రారంభించిన సందర్భంగా ఆయన ఈ వ్యాఖ్యలు చేశారు. పారిశ్రామికాభివృద్ధి కేవలం కర్మాగారాలకే పరిమితం కాకుండా.. స్థానిక ప్రజల ఆస్తుల విలువను పెంచుతూ ప్రాంతీయ ఆర్థిక వ్యవస్థను బలోపేతం చేస్తుందని ఆయన వివరించారు. రాష్ట్ర అభివృద్ధిని కాంక్షిస్తూ ప్రభుత్వం ‘తెలంగాణ రైజింగ్ 2047’ విజన్ డాక్యుమెంట్‌ను సిద్ధం చేసింది. ఇందులో భాగంగా రాష్ట్రాన్ని క్యూర్ (CURE), ప్యూర్ (PURE), రేర్ (RARE) అనే మూడు భాగాలుగా విభజించి అభివృద్ధి చేయనున్నారు. సముద్ర తీరం లేని తెలంగాణకు మచిలీపట్నం పోర్టుతో అనుసంధానం కల్పించేందుకు 12 వరుసల గ్రీన్ ఫీల్డ్ ఎక్స్‌ప్రెస్ వే , రైల్వే లైన్ నిర్మాణానికి అనుమతులు కోరినట్లు సీఎం తెలిపారు. ఫ్యూచర్ సిటీ, మెట్రో విస్తరణ వల్ల మహేశ్వరం, రావిర్యాల పరిసర ప్రాంతాల్లో భూముల ధరలకు రెక్కలు రానున్నాయి. పెట్టుబడులకు పారదర్శకమైన విధానాలు అమలు చేయడం వల్ల అంతర్జాతీయ సంస్థలు ఇక్కడ పరిశ్రమలు నెలకొల్పేందుకు ఆసక్తి చూపుతున్నాయి. పక్క రాష్ట్రాలతో జల వివాదాల విషయంలో తెలంగాణ ప్రభుత్వం ఘర్షణ వైఖరిని కోరుకోవడం లేదని రేవంత్ రెడ్డి స్పష్టం చేశారు. కోర్టుల్లో పంచాయతీల కంటే చర్చల ద్వారా సమస్యలను పరిష్కరించుకోవాలని ఆంధ్రప్రదేశ్ ముఖ్యమంత్రి నారా చంద్రబాబు నాయుడుకి విజ్ఞప్తి చేశారు. ఉమ్మడి రాష్ట్రంలో మంజూరైన పాలమూరు-రంగారెడ్డి, కల్వకుర్తి, డిండి వంటి ప్రాజెక్టులకు అభ్యంతరాలు తెలపవద్దని కోరారు. ఏపీ రాజధాని అమరావతి అభివృద్ధికి తెలంగాణ సహకారం ఎలా అవసరమో… తెలంగాణ ప్రాజెక్టులకు ఏపీ సహకారం అలాగే ఉండాలని ఆయన సూచించారు. రాజకీయ ప్రయోజనాల కంటే రైతుల ప్రయోజనాలే ముఖ్యమని పేర్కొన్నారు. రాష్ట్రంలో ఐటీ, ఫార్మా, గ్లోబల్ కేపబిలిటీ సెంటర్స్, డేటా సెంటర్ల స్థాపన ద్వారా నిరుద్యోగ యువతకు ఉపాధి కల్పించడమే లక్ష్యంగా ప్రభుత్వం కొత్త పాలసీలను తీసుకువస్తోంది. విద్యుత్, పర్యాటక, వైద్య రంగాల్లో ప్రైవేటు పెట్టుబడులను ప్రోత్సహించడం ద్వారా ఆర్థిక వృద్ధిని సాధించాలని సంకల్పించింది. జర్మనీ, జపాన్ వంటి అభివృద్ధి చెందిన దేశాల సాంకేతికతతో ఇక్కడ పరిశ్రమలు రావడం వల్ల తెలంగాణ అంతర్జాతీయ స్థాయిలో పోటీ పడగలుగుతుందని సీఎం ధీమా వ్యక్తం చేశారు. ఈ కార్యక్రమంలో శాసనసభ స్పీకర్ గడ్డం ప్రసాద్ కుమార్, మంత్రి దుద్దిళ్ల శ్రీధర్ బాబు మరియు ఇతర ప్రజాప్రతినిధులు పాల్గొని పారిశ్రామిక ప్రగతిపై హర్షం వ్యక్తం చేశారు.