జనం న్యూస్: శ్రీశైలంలో అర్ధరాత్రి చిరుత కలకలం రేపింది. పాతాళగంగ సమీపంలోని ఓ ఇంటి వద్ద అర్ధరాత్రి చిరుత ప్రత్యక్షమైంది. ఈ ఘటనకు సంబందించిన దృశ్యాలు సీసీ కెమెరాల్లో రికార్డు అయ్యాయి. ఈ నేపథ్యంలో పాతాళగంగలో పుణ్యస్నానాలకు వెళ్లే భక్తులు అప్రమత్తంగా ఉండాలని అధికారులు సూచించారు. తెలుగు రాష్ట్రాలలోని అటవీ ప్రాంతాలలో చిరుతలు, పులుల సంచారం విపరీతంగా పెరిగింది. ఇటీవల కాలంలో జనావాస ప్రాంతాలలో చిరుతల సంచారం కలకలం రేపుతున్నాయి. దీంతో ప్రజల్లో భయాందోళనకర వాతావరణం నెలకొంది.ముఖ్యంగా తిరుపతి, కర్నూలు, శ్రీశైలం, చిత్తూరు వంటి అటవీ ప్రాంతాలలో ఈ చిరుత, పులుల సంచారం పెరిగింది.అటవీ ప్రాంతాలైన గిరిజన ప్రాంతాలు, అటవీ ప్రాంతాలకు సమీపంలో ఉన్న గ్రామాలు, పట్టణాల్లోకి చిరుత, పులులు సంచరిస్తూ భయాందోళన కలిగిస్తున్నాయి.నిత్యం చిరుతలు, పులి సంచారం ఘటనలు వెలుగులోకి వస్తూనే ఉన్నాయి. ఏజెన్సీ ప్రాంతాలలో ఏనుగులు హల్ చల్ చేస్తుంటే. గ్రామాల్లో మాత్రం పులులు హల్చల్ చేస్తున్నాయి. దీంతో ప్రజలు భయంతో హడలిపోతున్నారు. ఎప్పుడు ఏం జరుగుతుందోనన్న టెన్షన్ పడుతున్నారు. తాజాగా శ్రీశైలంలో అర్థరాత్రి చిరుత కలకలం రేపింది. శ్రీశైలంలోని పాతాళగంగ వద్ద చిరుత. నంద్యాల జిల్లాలోని శ్రీశైలం భ్రమరాంబ సమతే మల్లికార్జున స్వామి వారి ఆలయం సమీపంలో చిరుత సంచారం కలకలం రేపింది.నల్లమల్ల కొండల్లో దట్టమైన అటవీ ప్రాంతంలో ఈ దేవాలయం కొలువై ఉన్న సంగతి తెలిసిందే. అయితే గురువారం అర్థరాత్రి పాతాళగంగ సమీపంలోని ఓ ఇంటి వద్ద చిరుత కదలికలు సీసీ టీవీలు రికార్డు అయ్యాయి.ఈ విషయాన్ని అధికారులు స్వయంగా వెల్లడించారు. చిరుత సంచారం నేపథ్యంలో పుణ్య స్నానాలకు వెళ్లే భక్తులు అప్రమత్తంగా ఉండాలని అధికార యంత్రాంగం సూచిస్తుంది.గతేడాది ఇదే జనవరి నెలలో శ్రీశైలం పూజారి ఇంట్లోకి చిరుత ప్రవేశించిన సంగతి తెలిసిందే. కర్నూలు జిల్లాలో.. కర్నూలు జిల్లాలోని కోసిగి మండల పరిధిలో కూడా చిరుత సంచారం స్థానికులను భయాందోళనకు గురి చేసింది. గౌడుగల్ గ్రామ సమీపంలో ఉన్న కొండ ప్రాంతంలో రెండు చిరుతలు గ్రామంలోకి ప్రవేశించేందుకు ప్రయత్నించాయి. చిరుతల సంచారాన్ని గమనించిన ప్రజలు గట్టిగా కేకలు వేస్తూ తరిమేశారు. దీంతో భయపడిన చిరుతలు తిరిగి కొండల్లోకి పరుగులు పెట్టాయి. అయితే ఈ విషయంపై గ్రామస్తులు ఆందోళన వ్యక్తం చేస్తున్నారు. వాటిని బంధించి డీప్ ఫారెస్ట్ లోకి వదిలేయాలని…తమ భద్రతకు భరోసా కల్పించాలని స్థానిక ప్రజలుకోరుతున్నారు.
