తెలుగు రాష్ట్రాల మధ్య నదీజలాల వివాదం

సాక్షి డిజిటల్ న్యూస్: ఆంధ్రప్రదేశ్, తెలంగాణ రాష్ట్రాల మధ్య నదీ జలాల వివాదాల పరిష్కారానికి కేంద్రం కమిటీ కీలక దిశగా అడుగులు వేస్తోంది. ఈ క్రమంలో సీడబ్ల్యూసీ ఛైర్మన్ నేతృత్వంలో నిపుణుల బృందం కమిటీని ఏర్పాటు చేసింది. ఈ కమిటీ పెండింగ్ ప్రాజెక్టులు, నీటి పంపిణీపై సమగ్ర అధ్యయనం చేయనుంది. తెలుగు రాష్ట్రాల మధ్య జలవివాదాలు నడుస్తున్న సంగతి తెలిసిందే. గత నెల రోజులుగా తెలంగాణలో నదీ జలాలపైనే తీవ్ర చర్చ జరుగుతుంది. బీఆర్ఎస్ హయాంలో నీటి పంపకాల విషయంలో తెలంగాణకు తీవ్ర అన్యాయం జరిగింది అని కాంగ్రెస్ ఆరోపిస్తోంది. మరోవైపు కాంగ్రెస్ పార్టీ నీటి పంపకాల విషయంలో నిర్లక్ష్యంగా వ్యవహరిస్తుందని దాని ఫలితంగా తెలంగాణకు తీరని అన్యాయం జరుగుతుంది అని బీఆర్ఎస్ ఆరోపిస్తోంది. ఇలాంటి తరుణంలో కేంద్ర ప్రభుత్వం కీలక నిర్ణయం తీసుకుంది. ఆంధ్రప్రదేశ్, తెలంగాణ రాష్ట్రాల మధ్య దశాబ్దకాలంగా కొనసాగుతున్న కృష్ణా, గోదావరి నదీ జలాల వివాదాల పరిష్కారం విషయంలో కేంద్ర చొరవచూపింది. ఈ సమస్యలకు శాశ్వత పరిష్కారం చూపేందుకు ఓ ఉన్నతస్థాయి నిపుణుల కమిటీని ఏర్పాటు చేసింది. ఈ మేరకు కేంద్ర జల్‌శక్తి మంత్రిత్వ శాఖ ఉత్తర్వులు జారీ చేసింది. కమిటీకి చైర్మన్‌గా సీడబ్ల్యూసీ చైర్మన్ ఇకపోతే కేంద్ర జల్‌శక్తి మంత్రిత్వ శాఖ ఉత్తర్వులు మేరకు ఏర్పాటు చేసిన నిపుణుల కమిటీకి కేంద్ర జలవనరుల సంఘం (సీడబ్ల్యూసీ)చైర్మన్ ఈ నూతన కమిటీకి కూడా చైర్మన్‌గా వ్యవహరించనున్నారు. మరోవైపు కృష్ణా, గోదావరి నదీ యాజమాన్య బోర్డుల (కేఆర్‌ఎంబీ, జీఆర్‌ఎంబీ) చైర్మన్లు, జాతీయ జల అభివృద్ధి సంస్థ (ఎన్‌డబ్ల్యూడీఏ) చీఫ్ ఇంజినీర్‌తో పాటు ఇరు రాష్ట్రాల జలవనరుల శాఖల ఉన్నతాధికారులు సైతం ఈ కమిటీలో సభ్యులుగా ఉంటారని కేంద్రం ప్రభుత్వం ఉత్తర్వుల్లో పేర్కొంది. కృష్ణా జల వివాదాల ట్రైబ్యునల్-2 గడువు పొడిగింపు ఇదిలా ఉంటే గతేడాది జూలైలో కేంద్ర జల్‌శక్తి మంత్రి సీఆర్ పాటిల్ అధ్యక్షతన జరిగిన అపెక్స్ కౌన్సిల్ సమావేశంలో ఈ కమిటీ ఏర్పాటుకు నిర్ణయం తీసుకున్న సంగతి తెలిసిందే.ఇటీవల డిసెంబర్‌లో తెలంగాణ ప్రభుత్వం తమ ప్రతినిధులను నామినేట్ చేయడంతో కమిటీ ఏర్పాటు ప్రక్రియ వేగవంతమైంది. ఇరు రాష్ట్రాల మధ్య నీటిని సమానంగా పంచడం, పెండింగ్‌లో ఉన్న ప్రాజెక్టులు, కొత్త ప్రతిపాదనలు వంటి కీలక అంశాలపై ఈ కమిటీ సమగ్రంగా అధ్యయనం చేసి, పరిష్కార మార్గాలను సూచిస్తుంది. ఇదే సమయంలో కృష్ణా జల వివాదాల ట్రైబ్యునల్-2 (కేడబ్ల్యూడీటీ-2) గడువును కూడా కేంద్రం 2026 జూలై వరకు పొడిగించింది.