పయనించే సూర్యుడు న్యూస్ : ప్రధాని నరేంద్ర మోదీకి ఓమన్ అత్యున్నత పురస్కారం Order of Oman లభించింది. గల్ఫ్ దేశాల్లో ఐదు అత్యున్నత అవార్డులు పొందిన తొలి నేతగా చరిత్ర సృష్టించారు. CEPA ఒప్పందం కుదిరింది. ప్రధానమంత్రి నరేంద్ర మోదీకి ఓమన్ దేశం తన అత్యున్నత పౌర పురస్కారమైన ‘ఆర్డర్ ఆఫ్ ఓమన్’ (ఫస్ట్ క్లాస్) అందజేసింది. గల్ఫ్ పర్యటనలో భాగంగా మస్కట్ చేరుకున్న మోదీకి ఓమన్ సుల్తాన్ హైతం బిన్ తారిక్ అల్ సైద్ ఈ ప్రతిష్టాత్మక అవార్డును ప్రదానం చేశారు. భారత్, ఓమన్ దేశాల మధ్య ద్వైపాక్షిక సంబంధాలను బలోపేతం చేయడంలో మోదీ పోషించిన విశిష్ట పాత్రకు గుర్తింపుగా ఈ గౌరవం దక్కింది. ఈ పురస్కారం అందుకోవడం ద్వారా అంతర్జాతీయ స్థాయిలో అత్యధిక అవార్డులు పొందిన అగ్రనేతల్లో మోదీ ఒకరిగా నిలిచారు. ప్రధాని పదవి చేపట్టిన తర్వాత ఆయనకు దక్కిన 29వ అంతర్జాతీయ గౌరవం ఇది. ఈ అవార్డును మోదీ భారత ప్రజలకు అంకితం చేశారు. పూర్వీకుల కాలం నుంచి మాండ్వి నుంచి మస్కట్ వరకు సముద్ర మార్గంలో ప్రయాణించి ఈ బంధానికి పునాదులు వేసిన వారిని ఆయన స్మరించుకున్నారు. రెండు దేశాల మధ్య ఉన్న నమ్మకానికి, ప్రేమకు ఈ అవార్డు నిదర్శనమని ప్రధాని పేర్కొన్నారు. గల్ఫ్ దేశాల్లో రికార్డు: గల్ఫ్ రీజియన్లో మొత్తం ఆరు దేశాలు ఉండగా, అందులో ఐదు దేశాల నుంచి అత్యున్నత పౌర పురస్కారాలు పొందిన తొలి ప్రపంచ నేతగా మోదీ చరిత్ర సృష్టించారు. ఇప్పటివరకు సౌదీ అరేబియా, యూఏఈ, బహ్రెయిన్, కువైట్, ఓమన్ దేశాలు ఆయనను తమ అత్యున్నత అవార్డులతో గౌరవించాయి. గతంలో మోదీ అందుకున్న గల్ఫ్ పురస్కారాలు: సౌదీ అరేబియా: 2016లో ‘ఆర్డర్ ఆఫ్ కింగ్ అబ్దుల్ అజీజ్’ అవార్డును అందజేసింది. యూఏఈ: 2019లో తమ దేశ అత్యున్నత పురస్కారం ‘ఆర్డర్ ఆఫ్ జాయద్’తో గౌరవించింది. బహ్రెయిన్: 2019లోనే ‘కింగ్ హమద్ ఆర్డర్ ఆఫ్ ది రినైసాన్స్’ను మోదీకి ప్రదానం చేసింది. కువైట్: 2024 డిసెంబర్లో ‘ఆర్డర్ ఆఫ్ ముబారక్ అల్-కబీర్’ పురస్కారాన్ని అందజేసింది. చారిత్రక ఒప్పందం: అవార్డు ప్రధానోత్సవం అనంతరం భారత్, ఓమన్ మధ్య కీలకమైన ‘సమగ్ర ఆర్థిక భాగస్వామ్య ఒప్పందం’ (CEPA) కుదిరింది. ముఖ్యంగా ఆయుష్ (AYUSH) ఉత్పత్తులకు గల్ఫ్ మార్కెట్లో మంచి ఆదరణ లభించే అవకాశం ఉంది. ప్రపంచ నేతల సరసన ఓమన్ దేశం ఇచ్చే ఈ అత్యున్నత పురస్కారాన్ని గతంలో బ్రిటన్ రాణి క్వీన్ ఎలిజబెత్-2, నెల్సన్ మండేలా వంటి ప్రపంచ ప్రఖ్యాత నేతలు అందుకున్నారు.
